"Чув тушди” рукни остида хонанда Достон Убайдуллаев билан қилган ҳазилимиз ёдингиздами? Ўшанда Достонни касалхонага чақиртириб вирус юққан бўлиши мумкинлиги билан қўрқитгандик. Бу сафар актриса Зарина Низомиддиновага "тузоқ”қўйдик.

Уни 1 июнь — Халқаро болаларни ҳимоя қилиш куни муносабати билан "Юлдузлар болалигини эслаб” деб номланган фотосессияга таклиф этдик ва унинг жонли чиқиши учун Цирк саҳнасини танладик. Аренага тушгач, Зарина болалиги ёдига тушиб, хурсанд бўлганча гоҳ ўйнаб, гоҳ сакраб суратга туша бошлади. Кейин цирк ходимларидан копток сўраб олдик. Актриса копток билан мазза қилиб ўйнаётганда бирдан коптокнинг дами чиқиб кетди. Бизга тешик копток беришибди-да, деб ўйлагандик, лекин Цирк ходими "тешиб қўйдинглар-ку, бу қиммат копток ахир” деб бизни койиб берди.

Циркнинг техник ходимлари Зарина учун энг чиройли арғамчини олиб беришди.
Иштирокчимиз "Юлдузлар болалигини эслаб” лойиҳасига буткул берилиб кетганда уни парашютда учиб кўришга таклиф этдик.
Зарина: — Баландликдан қўрқаман! Парашютда учолмайман!
Дилфуза: — Кўпам баландга чиқмайсиз, қўрқманг. Бор-йўғи 2-3 метрга кўтарилсангиз етади. Болалигингизда парашютда учишни истагансиз-ку, тўғрими?
Зарина: — Тўғри-ю, лекин... (қўрқа-писа парашютни ушлаб турган темир арқонларга қараб қўйди).
Циркнинг техник ходимлари Заринага парашютнинг камарларини боғлаб қўйиб юбориши билан у арена бўйлаб учиб, кўтарила бошлади.

Зарина: — Вооой, қўрқиб кетяпма-а-а-н! Лекин учиш мазза экан!..
Фотосессия авжига чиққанда Дилфуза Собировага таҳририятдан "қўнғироқ қилишиб” зарур иш билан "чақириб қолишди”. У Зарина билан хайрлашиб шошиб чиқиб кетди.
Видеооператор камерасини Циркнинг оркестри ўтирадиган жойга жойлаштираётганда Алиянинг телефони жиринглади.
Ким биландир гаплашган Алия операторга қараб: — Ғайрат, машинангизни четроққа қўйсангиз бўлмайдими? Цирк директори телефон қиляпти, ходимлари "ҳозир съёмкага келганлар машинасини йўл устига қўйиб кетишибди, олишсин” дебди. Боринг, тезроқ йўлни очинг, гап эшитмайлик.
Оператор камерани жойлаштириб бўлди-ю, югуриб чиқиб кетди. Бу пайтда фотосуратчи Равшан парашютдаги Заринага "болалардек қувончни кўрсатиб беринг” деб суратга олаверди.


Зарина: — Балки етар, оёқларим оғриб кетди. Жуда ноқулай экан...
Алия: — Бирпас чиданг, Зарина, фотосессия яхши чиқиши керак!
Равшан: — Юқори қоронғи бўлгани учун расмлар бироз хира чиқяпти, мен тезда бориб машинамдан бошқа "объективка” олиб келай. Сиз пастга тушмай туринг, тез қайтаман. Аренада Алия билан ёлғиз қолган Зарина 7-8 метр баландликда ноқулай ҳолатда осилиб туравериб чарчаб кетди шекилли:
— Алия, парашютни туширадиган бола қани?
Алия: — Ҳайронман. Ҳозир сиз қимирламай туринг, мен бирортасини топиб келаман.
Зарина: — Вой, сиз ҳам кетасизми?!
(Алия унинг эътирозига қарамай "бирортасини чақириб келаман” деди-ю, югуриб парда ортига ўтиб кетди).
Қўрққанидан қимирламай турган Заринани ваҳима боса бошлади. У бор овозда "эй, мальчик, где вы?» деганча парашютни кўтарган циркнинг техник ходимини чақира бошлади.
Ҳеч ким жавоб бермагач бор овозда ёрдамга чақира бошлади: — Мальчи-и-и-к? Ал-и-и-и-я? Қанисизлар? Тавба, ҳамма бирдан қаёққа кетиб қолди?


Кимдир ёрдамга чақираётганини эшитиб бир йигит аренага кирди:
— Ие, сиз Зарина Низомиддиновамисиз? — деди у кўзларига ишонмай. — Циркда ҳам ишлайсизми?
Зарина: — Йўғ-ей, циркда ишламайман. Бир фотосессияга келувдим, мени парашютда қолдиришиб, ҳамма қаёққадир йўқолиб қолди. Шу ерда ишласангиз бирортасини чақиринг, мени тушириб юборишсин.
— Мен бу ерда ишламайман, амалиёт ўтагани келган талабаман.
Зарина: — Парашютни туширишни биласизми?
Талаба: — Билмайман, лекин сизнинг ашаддий мухлисингизман. Зарина, сиздан битта илтимос, диплом ишимда суратга тушиб беринг.
Зарина: — Йўқ, мен диплом ишларида суратга тушмайман! Ундан кўра, бориб ходимлардан бирортасини топиб келинг, илтимос.
Талаба кимнидир чақириб келиш учун кетганда техник ходим кириб келди.

Зарина: — Хайрият-ей! Бормисиз? Мени тезроқ ерга туширинг, оёқларим увишиб кетди.
Техник ходим ҳозир деди-ю, мосламасини бураганди, парашют қаттиқ силкиниб бир метрча пастга тушди. Зарина қўрққанидан қичқириб юборди. Лекин техник ходим қанча "ҳаракат қилмасин” мослама бошқа буралмади. Шундан кейин у "ҳозир калитимни олиб келай, негадир буралмаяпти” деб яна қайтиб кетди.

Сабри тугаган Зарина энди йиғлагудек бўлиб, баландроқ овозда ёрдамга чақира бошлади.
Шу пайтда шошиб қайтиб келган талаба йигит унга бир қоғоз узатди: — Ҳозир келишаркан. Унгача мана буни ўқиб туринг, Алия сизга бериб юборди.
Зарина: — Қанақа қилиб оламан, бўйингиз етмайди-ку, — деди жаҳл билан.
Кейин талаба йигитнинг қўлидаги "Даракчи ҳазили” деб ёзилган қоғозга кўзи тушиб, "Вой! Алдашдими?!” деб юборди.

Ижодий ходимлар ва цирк ходимлари бараварига "Чув тушдингиз, бу ҳазил эди!” деб кулиб кириб келишганини кўриб у ҳам араз аралаш кула бошлади: 
— Боринглар-ей!.. Нега айнан мен?! Бошқа одамни алдасанглар бўлмасмиди? Ўзим ҳам айтдим-а, нега ҳамма чиқиб кетди деб. Энди умуман "Даракчи”га ишонмайман!..

Дилфуза: — Сизга бу лойиҳа адреналин бўлди. Энди янада яхшироқ ишлайсиз.
Зарина: — Ростдан ҳам бироз қўрқинчлилигини айтмаса, учиш зўр экан! Қаттиқ қўрққан бўлсам-да, барибир қайтиб келишади-ку, деган ишонч тинчлантириб турди.
Уни тушириб парашютдан ечиб олишганда оёқлари увишиб кетганидан юролмай қолди. Бироз аразлаб турган актриса кейин ҳаммага қўшилиб кула бошлади. Актрисанинг цирк ходимлари орасида ҳам мухлислари анчагина экан, барча билан суратга тушган актрисага циркдан иш ҳам таклиф қилишди.
Биз эса Заринани қўрқитганимиз учун бирозгина виждонимиз қийналган бўлса-да, яна бир лойиҳамиз омадли якун топганидан хурсанд бўлиб актриса билан хайрлашдик.