Уммонда 22 ёшгача бўлган Осиё чемпионати давом этмоқда. 3-турдан ўрин олган Саудия Арабистони терма жамоасига қарши ўйинда вакилларимиз имкониятни бой беришди ва мусобақани эрта тарк этишди.
Ўйинни ҳар икки жамоа ҳам эҳтиёткорлик билан бошлади. Чунки ҳар икки жамоада ҳам кейинги босқичга чиқиш имконияти бор эди ва гол ўтказиб юбормаслик биринчи планга чиқди. Ўтган ўйинда майдонга тушмаган етакчиларимизнинг сафга қайтиши ўйиннинг хилма-хил бўлишини таъминлади. Сардор Рашидов ҳар доимгидек фаол бўлди.
Биринчи бўлим ўртасида вакилларимиз жуда яхши ҳужум уюштиришди. Чап қанотдан Дилшод Жўраев тўпни ҳаволатиб жарима майдончасига узатиб берди. Ҳужумчи ва ҳимоячилардан баланд сакраган Максимилиан Фомин жуда қулай вазиятга эга бўлди, лекин унинг бош билан берган зарбасини дарвозабон қайтариб қолди. Биринчи бўлим шу тариқа анча хотиржамлик билан якунланди.
Иккинчи бўлимни вакилларимиз фаол бошлашди. Сардор Рашидов бир неча вазиятда қанотдан ёриб кириб тўпни жарима майдончасига узатди. Лекин ҳа деганда узатмалар аниқ бўлавермади. Ўйиннинг 61-дақиқасида рақибларимиз ҳисобни очишди. Саудиялик футболчининг 25 метрлар чамасидан берган зарбаси дахшатли траектория олди ва Одил Аҳмедовнинг Қатар дарвозасига урган голи каби дарвозамиздан жой олди. Тан олиш керак бу голда кимнидир айблай олмаймиз.
Ўйиннинг 74-дақиқасида футболчиларимиз жарима майдончасига ёриб киришди. Ҳужумчининг зарбасидан кейин тўп рақибларнинг қўлига тегди ва ҳакам 100 фоизлик пенальтини бермади. Ҳисоб ўзгармади. 88-дақиқада рақиблар жуда яхши имкониятга эга бўлишди. Егор Кримец жарима майдончаси ичида тўпни дарвозабонга оёқ билан узатди ва дарвозабон катта қийинчлик билан тўпни майдон ташқарисига чиқариб юборди. Эркин жарима зарбаси белгиланди, лекин бу вазиятдан рақиблар фойдалана олишмади. Шу тариқа дуранг натижа ҳам етарли бўлган ўйинда имкониятни бой бердик.
Ёшлар (U22) ўртасида Осиё чемпионати, "D" гуруҳи, 3-ТУР
САУДИЯ АРАБИСТОНИ - ЎЗБЕКИСТОН - 1:0
Гол: Закариё ас-Суданий (60)
Огоҳлантиришлар: Закариё ас-Суданий (15), Ал-Ҳафиз (90+2) — Егор Кримец (33), Сардор Мирзаев (56)
Саудия Арабистони: 21. Муҳаммад ал-Овайс, 2. Ҳамад ал-Жайзоний, 3. Муҳаммад ал-Фатил, 5. Закара ас-Суданий, 8. Абдуллоҳ Холид ал-Аммар, 12. Абдулфаттоҳ Асирий, 14. Мажид ал-Нажроний, 16. Абдуллоҳ Отайф (С), 17. Абдуллоҳ ал-Ҳафиз, 19. Солиҳ аш-Шеҳрий (Иброҳим ал-Иброиҳим 67), 23. Абдуллоҳ Маду
Ўзбекистон: 1. Акмал Турсунбоев, 13. Даврон Ҳошимов, 2. Егор Кримец (С), 7. Владимир Козак, 18.Максимилиан Фомин, 4. Дилшод Жўраев (Абдул Азиз Юсупов 84), 6. Аббос Махсталиев, 9. Сардор Мирзаев, 23. Сардор Рашидов (Темурхўжа Абдухолиқов 59), 10. Жамшид Искандеров, 11. Игорь Сергеев.
ИРОҚ - ХИТОЙ - 1:0
