Poytaxtimizning qoq markazida, shahar hokimiyatining sobiq binosi yonida zamonaviy qulayliklarga ega yana bir yangi istirohat bog‘i ishga tushdi. Qariyb besh gektar maydonni egallagan bog‘da uch mingdan ko‘proq manzarali daraxt mavjud. Bu haqda uza.uz sayti xabar bermoqda.
So‘lim gulzoru yashil maysazorlar, musiqali favvoralar bog‘ning ko‘rkiga ko‘rk qo‘shish barobarida yozda harorat mo‘tadilligini ta’minlaydi.
Bog‘ bejiz "Bolajon” deb nomlanmagan. Bu yerda bolakaylar uchun turli attraksionlar, ertaklar maydonchasi barpo etilgan. Shohmot, shashka, stol tennisi bilan shug‘ullanish imkoniyati yaratilgan. Bog‘ni oilalarning sevimli dam olish maskaniga aylantirish, bolalar va yoshlar uchun turli madaniy-ma’rifiy tadbirlar, xayriya aksiyalari o‘tkazish rejalashtirilgan.
foto: darakchi.uz
"Bolajon” istirohat bog‘ining ochilishiga bag‘ishlangan madaniy tadbirda poytaxtimizdagi madaniyat uylari, "Barkamol avlod” markazlari, bolalar va yoshlar ijodiy jamoalarining konsert dasturi, yosh sportchilarning ko‘rgazmali chiqishlari namoyish etildi, rasmlar tanlovi o‘tkazildi.
