"Coca-Cola” brendining asosiy raqobatchisi hisoblangan "Pepsi” savdo belgisi O‘zbekiston bozoriga rasman kirib kelmoqda. Bu haqda "WorldOfAd.asia” blogi xabar bermoqda.

"WorldOfAd.asia”ning yozishicha, O‘zbekiston bozorida "Coca-Cola” brendining 20 yillik yaqqol yetakchiligidan so‘ng nihoyat unga qarshi katta va teng kuchli raqobatchi paydo bo‘lmoqda. Ayni vaqtda Toshkent shahridagi tashqi reklama maydonchalarida "Pepsi” ramzlari tushirilgan tizerlar paydo bo‘lgan. "Bularning barchasi faqat bir narsadan dalolat beradi, - deb yozadi "WorldOfAd.asia”. – ATL, BTL, PR va Media va kreativ sohalarida kuchli raqobatni yuzaga keladi va ko‘p jihatdan bu o‘zbek reklama bozoriga o‘zining ijobiy ta’sirini ko‘rsatadi”.

O‘zbekistonda "Pepsi” savdo belgisi nomidan "International Beverages Tashkent” MChJ faoliyat olib boradi. "MyJob.uz” e’lonlar xizmatidagi kompaniya ta’rifida "Pepsi” kompaniyasi tarixi yozilgan, firma e’lonlar xizmatida 15 tagacha bo‘sh ish o‘rinlari haqida e’lon joylashtirgan bo‘lib, ular orasida direktor, bosh hisobchi lavozimlari ham bor.

"Infoman.uz” saytining o‘z ma’lumotlariga ko‘ra, "Pepsi” O‘zbekistonda "Arktika Bottlers” MChJ QK tomonidan ishlab chiqariladi. "Arktika Bottlers” MChJ QK 2007-yilda lixtenshteynlik hamkorlar bilan birgalikda ishga tushirilgan bo‘lib, zavod alkogolsiz ichimliklar ishlab chiqarishga ixtisoslashgan. "Arktika Bottlers” kompaniyasi "Arktika Premium”, "Fensi”, "Fungo” ichimliklari, "Arctea” sovuq choy brendlari egasi hisoblanadi.


Foto: WorldOfAd.asia

"Yellow Pages” va "Golden Pages” ma’lumotnomalarida "International Beverages Tashkent” firmasi to‘g‘risida birorta ma’lumot uchramadi. "Pepsi” savdo belgisi uchun qaysi domen ostida sayt ochilishi hozir ma’lum emas, ammo ccTLD.uz ma’lumotlariga ko‘ra, brend uchun ayni muddao bo‘lishi mumkin bo‘lgan pepsi.uz domeni "Grandos Trade Limited” xorijiy shirkati tomonidan 2011-yilning 27-sentabrigacha band qilingan bo‘lib, saytga kirmoqchi bo‘lganingizda ingliz tilida "Bu domen sotiladi” yozuvini ko‘rishingiz mumkin.

"PepsiCo” kompaniyasi oziq-ovqat mahsulotlari hamda salqin ichimliklar ishlab chiqaruvchi dunyodagi ikkinchi eng yirik kompaniya hisoblanadi. Kompaniya hozirda "Pepsi”, "7up”, "Mirinda”, "Tropicana”, "Lay’s” va boshqa mashhur brendlar ostida mahsulotlar ishlab chiqarmoqda. Uning mahsulotlari butun dunyo bo‘ylab 200 dan ortiq mamlakatda sotiladi va hozirda kompaniyada jami 185 ming kishi mehnat qilmoqda.

"Beverage Digest” tadqiqot kompaniyasining ma’lum qilishicha, 2010-yilda AQShda jami 927 million butilka "Diet Coke” ("Coca-Cola”) sotilgan. Xuddi shu davrda mamlakatda 892 million butilka "Pepsi” ichimligi sotilgan.

Shuni aytib o‘tish kerakki, "Coca-Cola” ichimligining klassik varianti hanuz okeanorti chempionligini o‘zida saqlab turibdi. O‘tgan yilda amerikaliklar 1,6 milliard butilka "Coca-Cola” ichimligini iste’mol qilishgan.

"Coca-Cola” kompaniyasi 1886-yilda tashkil qilingan bo‘lib, jahondagi alkogolsiz salqin ichimlik ishlab chiqaruvchi eng yirik kompaniya hisoblanadi. Kompaniyaning bir yillik tovar aylanmasi 30 milliard dollar atrofida bo‘lib, uning mahsulotlari butun dunyo bo‘ylab 200 dan ortiq mamlakatda sotiladi. Kompaniya 2 800 dan ortiq nomdagi mahsulotlarni ishlab chiqaradi. Ulardan "Coca-Cola”, "Fanta”, "Sprite”, "Minute Maid”, "Burn” energetik ichimligi va boshqalar juda mashhur. Bundan tashqari, "Coca-Cola” brendi dunyodagi eng taniqli tovar belgisi sanaladi, uni butun Yer shari aholisining 94 foizi biladi.

Muhrim va UzEconomist hamkorlikda tayyorladi