Сингапур транспорт вазирлиги эрталабки соатларда метрода юришни текин қилиб қўйишга қарор қилди.
Хабарларга қараганда, йўловчилар ер ости транспортидан иш кунлари эрталаб 7:45га қадар текинга фойдаланишлари мумкин. Бироқ шу вақтгача улар метродан чиқиб кетишлари керак бўлади. Бундан ташқари, 7:45 дан 8:00 гача йўл ҳақига чегирма амалда бўлади. Ушбу тажриба июннинг сўнгги кунларида бошланиб, бир йил давом этади.
Вазирлик мутахассисларининг фикрича, бундай чора тиғиз пайтда метрони бироз бўшатишга ёрдам беради. Йўловчилар ер ости транспортига текин соатларда тушишга ҳаракат қилишади, бу эса кечроқ метронинг бироз бўш бўлишини таъминлайди.
Вазирлик ҳисоб-китобларига қараганда, ушбу лойиҳа бир йилда бюджетга 10 миллион Сингапур доллари (8 миллион АҚШ доллари)га тушади. Бундай чора кўрилишига 2011 йил октябрь ва декабрь ойларида метро поездлари ҳаракатида бузилиш бўлгани ҳақидаги танқидлар сабаб бўлди. Ўшанда тиғиз пайтда ҳаракат бир неча соатга бузилган эди.
Сингапур метросининг айрим йўллари бутун мамлакат ҳудудидан ўтади. Охирги йилларда йўловчилар оқими жуда ошиб кетди, бу эса метро ишида бузилишларга сабаб бўлмоқда. Сингапур ҳудудида 102та станция қурилган.
