O‘zbekistonlik FIFA referisi Ravshan Ermatovning so‘zlariga ko‘ra, bugungi kunda eng asosiy baxt — O‘zbekistondek tinch va farovon mamlakatda yashashdir. Bu haqda u RedPen nashriga bergan intervyusida aytib o‘tdi.

“Ha, men baxtli insonman. O‘zbekistondek tinchlik, xotirjamlik va farovonlik hukmronlik qilayotgan mamlakatda yashayotganimiz — eng asosiy baxtimiz. Sevimli ishing bilan shug‘ullanyapsan va bundan zavq olyapsan. Natijalarga erishib, hurmat-e’tibor orttiryapsan. Yaqinlaring, oilang, farzandlaring baxtiyor — bundan ortiq yana nima bo‘lishi mumkin?”, — dedi Ravshan Ermatov.

Ravshan Ermatov 2015-yil 27-dekabr kuni bo‘lib o‘tgan Globe Soccer taqdimotida, 2015-yil yakunlariga ko‘ra “Yilning eng yaxshi hakami” deb topildi. Oradan to‘rt kun o‘tib, 31-dekabr kuni O‘zbekiston Prezidenti Islom Karimov Ermatovni “Buyuk xizmatlari uchun” ordeni bilan taqdirlash to‘g‘risidagi farmonga imzo chekdi.

RedPen’ga bergan intervyusida Ermatov orden bilan mukofotlanganini bilgan vaqtida uni qanday hissiyotlar chulg‘ab olgani haqida so‘zladi.

“Yangi yil arafasida “Buyuk xizmatlari uchun” ordeni bilan taqdirlanishim unutilmas voqea bo‘ldi. Menga O‘zbekiston Futbol Federatsiyasidan qo‘ng‘iroq qilib, bu haqda aytishganida, Milliy olimpiya qo‘mitasida edim. O‘zimni biroz yo‘qotib qo‘ydim”, — dedi Ravshan Ermatov.

“Bunaqangi Yangi yil sovg‘asi hayotimda bo‘lmagan. Prezidentimiz tomonidan taqdim etilgan mazkur mukofot hadya etgan cheksiz quvonch va minnatdorchilik hissini hech qachon unutmayman”, — dedi taniqli hakam.

Avvalroq Ravshan Ermatov o‘z muvaffaqiyati sirini ma’lum qilgani haqida xabar berilgandi.