Yoshlar o‘rtasidagi Osiyo chempionati (U-22) birinchi turida O‘zbekiston terma jamoasi Xitoy termasi bilan to‘qnash keldi.
Uchrashuv vakillarimizning bir oz bo‘lsada ustunligi bilan boshlandi. To‘pga egalik qilish, kombinatsion hujumlar, jarima va burchak to‘plari bo‘yicha ham biznikilar yaxshiroq ko‘rsatkichga ega edi. Lekin futbolda qo‘shimcha ko‘rsatkichlar emas, asosiysi tablodagi hisob ekanligiga 1-bo‘limdayoq yana bir karra iqror bo‘ldik. Sababi, uchrashuvning 34-daqiqasida xitoyliklar tomonidan uyushtirilayotgan kam sonli hujumlarning biri gol bilan yakunlandi. Yang Chaosheng jarima maydonchasiga kirmay turib, darvozamizga zarba berib qo‘ya qoldi. Uncha kuchli bo‘lmasada, kerakli vaqtda, kerakli nuqtada yo‘naltirilgan zarba gol bilan yakunlandi. Birinchi bo‘limda boshqa e’tirofga loyiq vaziyat yuz bermadi.
Ikkinchi bo‘limda to‘liq tashabbusga ega bo‘lgan futbolchilarimiz o‘yin so‘nggidagina maqsadlariga yetishdi. 90-daqiqada jarima maydoniga uzatilgan to‘pni Fomin yanada orqaroqdan kelayotgan sherigiga yetkazib berdi. Yegor Krimets esa uncha uzoq bo’lmagan masofadan mo’ljalda adashmadi — 1:1.
Goldan ruhlangan o‘zbek o‘g‘lonlari yana hujumga intilishdi. Oradan ikki daqiqa o‘tib Iskanderovning jarima maydonchasi tashqarisidan bergan ajoyib zarbasidan so‘ng to‘p darvoza to‘siniga tegib qaytdi va unga hammadan birinchi bo‘lib Igor Sergeyev yetib kelib, darvozaga yo‘lladi — 2:1.
Shuhrat Maqsudov boshchiligidagi O‘zbekiston yoshlar terma jamoasi musobaqani o‘g‘ir kechgan uchrashuvdagi irodali g‘alaba bilan boshladi.
Guruhdagi ikkinchi uchrashuvda Saudiya Arabistoni va Iroq yoshlar terma jamoalari kuch sinashishdi. Havfi hujumlarga boy bo‘lgan o‘yinda iroqlik yoshlar raqibdan ustun ekanliklarini yaqqol namoyish etdilar va 3:1 hisobida zafar quchdilar.
