10 июндан 11 июнга ўтар кечаси Аҳмад Дониш ва Мойқўрғон кўчалари кесишган чорраҳада (А. Дониш кўчасидан АҚШ элчихонасига қайрилишда) 3 та автомобил иштирокидаги автохалокат юз берди, дея хабар беради www.uz24.uz сайти.

Автохалокатга кечга яқин ишламай қолган светофор сабаб бўлган. Бундан ташқари кўчанинг етарли даражада ёруғ эмаслиги оқибатида Матиз, Кобальт автомашиналари бир-бири билан тўқнашиб кетган. Тўқнашув шу даражада қаттиқ бўлганки, натижада ён томондан кетаётган Нексия русумли автомобил ҳам уларга урилиб кетган.

Ҳалокат чоғида йўл белгиси уриб кетилган ва атрофдаги бир неча дарахтларга зиён етган. Маълум бўлишича автомобиллар тўқнашуви вақтида тахминан 3-5 нафар киши оғир тан жароҳатларини олишган.

Улар орасида куч билан урилган ва эзғиланган Нексия автомобили ҳайдовчиси ўта қаттиқ жароҳатланган. Автохалокат жойи яқинидаги одамлар жабрланувчиларга Тез ёрдам машинасини кутмасданоқ зудлик билан ёрдам беришган, тез фурсатда Тез ёрдам машинаси ҳам етиб келган.

Маҳаллий аҳолининг айтишича, бу жойда тез-тез автохалокат ҳолатлари содир бўлади, бунга чорраҳанинг нотўғри режалаштирилганини сабаб бўлмоқда.