|
2013 йил 7 июнь куни Ўзбекистон Республикаси Олий Мажлиси Қонунчилик палатасининг навбатдаги мажлиси давом эттирилди. Унда депутатлар тасдиқланган кун тартибига кўра, иккинчи ўқишда иккита қонун лойиҳасини кўриб чиқдилар.
Улардан бири нефть қувурларига, газ қувурларига рухсатсиз уланиш йўли билан ўғирлик содир этганлик, уларга шикаст етказганлик ва уларни яроқсиз ҳолга келтирганлик учун жавобгарлик, шу жумладан жиноий жавобгарлик белгиланиши назарда тутилган қонун лойиҳасидир.
Ҳозирги кунда Жиноят кодексида, Маъмурий жавобгарлик тўғрисидаги кодексда назарда тутилган ўғирликни содир этганлик учун санкциялар ҳамда нефть ва газ маҳсулотлари қувурларига зарар етказганлик учун белгиланган жавобгарлик амалда содир этилаётган оғир жиноятларга мос эмас.
Шу муносабат билан, қувурлардан маҳсулотларни талон-тарож қилишга қарши курашиш соҳасини тартибга солувчи жиноий-ҳуқуқий базани такомиллаштириш зарурлиги мазкур қонун лойиҳаси киритилиши билан изоҳланмоқда. Жиноятларнинг ижтимоий жиҳатдан юқори даражада хавфли эканлигини ҳисобга олган ҳолда қонун лойиҳаси нормаларида жиноий ва маъмурий жавобгарлик санкцияларини кучайтириш назарда тутилган.
Қонун лойиҳасида электр ва иссиқлик энергиясидан, табиий газдан ноқонуний (ҳисобсиз) фойдаланиш мақсадида электр, иссиқлик, газ тармоқларига ўзбошимчалик билан уланиш, ҳисобга олиш асбобларини қасддан бузиш ёки ҳисобга олиш асбобларининг кўрсаткичларини ўзгартириш мақсадида уларга ташқаридан шикаст етказганлик учун ҳам тегишли жавобгарлик назарда тутилмоқда.
|
