Футбол бўйича Франция ва Германия терма жамоалари ўртасидаги ўртоқлик ўйини (2:0) якунланганидан сўнг трибуналардаги мухлислар "Стад де Франс" стадиони майдонига чиқиб келди.

Ушбу ўйин вақтида стадион яқинида портлашлар содир бўлди. Бу хабар туфайли хавфсизлик нуқтаи назаридан чиқиш дарвозалари ёпиб қўйилган ва мухлислар стадиондан чиқиб кетолмаган. Шундан сўнг улар трибуналарда ҳам бомба ўрнатилган бўлиши мумкинлигидан қўрқиб, очиқ майдонга ёпирилишган.

Бироз вақт ўтгач, ташқаридаги вазият назоратга олинган ва дарвозалар очилиб, одамлар стадионни тарк этган.

Эслатиб ўтамиз, Франция пойтахтида 13 ноябрь куни давомли терактлар содир этилди.

Терактлар учун жавобгарликни ИШИД ўз зиммасига олди.

Охирги маълумотларга кўра, теракт қурбонлари сони 150 нафардан ошган.