Yagona interaktiv davlat xizmatlari portalida yangi xizmat paydo bo‘ldi. Endi biometrik pasport uchun onlayn ariza berish mumkin, deb yozadi Anons.uz.
Hozircha bu loyiha Toshkent shahrining Olmazor tumanida yo‘lga qo‘yildi. Olmazor tumanida doimiy propiskaga ega bo‘lgan shaxs Yagona portaldagi elektron ariza formasini to‘ldirishi kerak.
Ariza Toshkent shahar Olmazor tumani Ichki ishlar bo‘limining Kirish, chiqish va fuqarolikni rasmiylashtirish bo‘limiga jo‘natilgandan so‘ng, u Ichki ishlar xodimlari tomonidan ko‘rib chiqiladi.
Agar hujjat to‘g‘ri to‘ldirilgan bo‘lsa, arizachiga avtomatik tarzda sana va vaqti ko‘rsatilgan sms-xabar jo‘natiladi. Unda biometrik ma’lumotlarni topshirish uchun Kirish, chiqish va fuqarolikni rasmiylashtirish bo‘limiga kelish zarurligi ma’lum qilinadi. Pasport tayyor bo‘lgani haqida arizachiga tegishli sms-xabar yuboriladi.
Avval xabar berganimizdek, ushbu portalda yangi 50ga yaqin xizmat yo‘lga qo‘yilgan. Biometrik pasportga onlayn ariza berish xizmati Yagona portalda "Xizmat taklif qiling” bo’limida ovoz berish natijalariga ko‘ra amalga oshirildi.
