"Microsoft” компаниясининг асосчиси Билл Гейтс "Forbes” журнали томонидан тузилган 400 та энг бой америкалик рўйхатида яна биринчи ўринни эгаллади.
Гейтс 1994 йилдан буён АҚШнинг энг бадавлат фуқароси номини сақлаб келаётганини айтиш жоиз. Бу йил "Forbes” экспертлари унинг мулкини 72 милрд.долларга баҳолади, бу ўтган йилга қараганда 6 млрд.долларга кўп.
Иккинчи ўринни "Berkshire Hathaway” компаниясининг хўжайини, инвестор Уоррен Баффет эгаллади, унинг мулки 58,5 млрд.долларга баҳоланмоқда, бу 2012 йилдаги кўрсаткичга қараганда 12,5 млрд.долларга кўпроқ. Рейтинг иштирокчиларидан бошқа ҳеч ким бир йил ичида бунчалик кўп пул ишлаб олмаган.
Учинчи ўринда "Oracle” софтвер компаниясининг асосчиси Ларри Эллисон бормоқда. Унинг мулки йил давомида ўзгармаган ва 41 млрд.долларни ташкил этган. Шунингдек, биринчи бешталикка ака-ука Чарльз ва Дэвид Кох ҳам кирди, уларнинг ҳар бирида 36 млрд.долларлик мулк қайд этилган.
"Forbes” экспертларининг қайд этишича, бу бешталик ўтган йилги рейтингдаги позицияларини сақлаб қолган. Қайд этиб ўтамиз, АҚШнинг 400 та энг бой одамига тегишли мулкнинг биргаликдаги ҳажми йилдан-йилга ортмоқда: 2013 йилда у 2 трлн.доллардан ошган, бу ўтган йилги кўрсаткичга қараганда 300 млн.долларга кўп. Экспертларнинг фикрича, бунга фонд бозори ва кўчмас мулк бозоридаги ўсиш сабабчи бўлган.
