Майкл Жексон Лондондаги концертларида бир миллион кишини тўплайди
Майкл Жексоннинг саҳнага қайтиши ҳали содир бўлмасдан турибоқ катта шов-шувларга сабаб бўлди. Хонанданинг Лондонда бўлиб ўтадиган концертлари ҳақидаги хабар унинг мухлисларини шу даражада қувонтирдики, поп-мусиқа қироли режалаштирилган чиқишлари сонини беш бараварга оширишга мажбур бўлди.

2000 йилларнинг бошларида мусиқа билан деярли хайрлашган Майкл Жексон анчадан буён саҳнага қайтишни мўлжаллаётганди. Оммавий ахборот воситалари ҳам қиролнинг саҳнага қайтиши ҳақидаги хабарларни бот-бот тарқатиб туришарди.
Ижодий фаолиятини яна йўлга қўйиш Жексон учун ҳаводай зарур эди. Биринчидан, жинсий зўравонлик билан боғлиқ жанжалли суд жараёнларидан мухлислари эътиборини чалғитиш ва йўқотилган обрўсини қайта тиклаш учун. Иккинчидан ва энг асосийси, Майклнинг молиявий аҳволи яхши эмас. Унинг қарзлари кундан кунга ошиб бормоқда, даромад манбаи эса йўқ. Хонанданинг сўнгги бутунжаҳон гастроли 1996-1997 йилларда бўлиб ўтган, сўнгги альбоми эса 2001 йилда чиқарилганди. Вазият шуни тақозо қилдики, у ҳатто ҳозирда ўзига тегишли бўлмай қолган Калифорниядаги машҳур ранчосини тарк этиб, Баҳрайнга кўчиб кетди. Бу ерда уни қиролнинг ўғли ўз ҳомийлигига олди.
Хонанда билан боғлиқ миш-мишлар 2008 йилнинг охирларида яна пайдо бўлди. Жексоннинг оила аъзолари Jackson Five оилавий гуруҳининг гастрол концертларини ташкил этишга қарор қилишди. Аммо Майкл ўзининг шахсий гастролини режалаштирганини шама қилган ҳолда уларнинг лойиҳасида иштирок этишдан қатъиян бош тортди.
Ва ниҳоят, 5 март куни поп-мусиқа қироли Лондоннинг энг машҳур O2 Arena майдонида туркум концертлар беришини расман эълон қилди. Жексоннинг айтишича, “This Is It!” деб номланган бу шоу унинг Британиядаги сўнгги чиқиши бўларкан.
Дастлаб ўн марта концерт берилиши билдирилган, биринчи концерт шу йилнинг 8 июлида бўлиб ўтиши режалаштирилганди. Промоутерлар агар мухлислар талаб қилишса бунга қўшимча равишда яна икки-учта концерт берилиши мумкинлигини ҳар эҳтимолга қарши айтиб қўйишганди. Талаб бор экан десак юмшоқроқ айтган бўламиз. 11 март куни, чипталар учун буюртмалар қабули бошлангач, Жексон ва билет тарқатувчиларнинг сайтларига сониясига 15 мингдан ортиқ киши киришни бошлади. Тармоқда ўта катта юкланиш пайдо бўлганлиги учун жуда кўпчилик буюртма бера олмаётганлигидан шикоят қилди. Кейинги соатлар давомида хонанда гастрол концертлари сонини икки бараварга кўпайтирди. Оқибатда O2 Arena концерт майдони мўлжалланганидек бир ойга эмас, деярли ярим йилга банд қилинди. 13 март куни Майкл Жексон шу йилнинг июл, август, сентябри ва 2010 йилнинг январ-феврал ойларида жами 50та шоу бўлиб ўтишини эълон қилди. Сўнгги шоу 24 февралга мўлжалланган.
Энг ҳайратланарлиси, жума куни эрталаб сотувга чиққан барча чипталар ўша куннинг ўзида сотилиб бўлган. O2 Arena майдони олдида 12 март оқшомида кўпминг кишилик навбат пайдо бўлди ва туни билан касса очилишини кутишди. Ташкилотчиларнинг хабар беришларича, дастлабки 18 соат давомида 360 мингта чипта сотилган. Бу соатига 20 мингта ёки дақиқасига 333 дона чипта сотилди деганидир. Промоутерлар чипта сотиш тезлиги бўйича рекорд янгиланганлигини таъкидлашмоқда. Афтидан, улар Пол Маккартнининг Лас-Вегасда апрелда берадиган концертига барча чипталар 7 сония ичида сотиб бўлинганини эшитишмаган. Аммо шуниси аниқки, Майкл O2 Arenaда 2007 йили 21та концерт берган Полнинг рекордини янгилади. O2 Arena ўз бағрига 20 минг нафар томошабинни сиғдира олишини ҳисобга олсак, Жексоннинг концертини битта шаҳарнинг ўзида бир миллион киши томоша қилади. Бу ҳам рекорд.
Мутахассисларнинг ҳисоб-китобларига қараганда, поп-мусиқа қироли Лондондаги концертларидан 400 миллион долларга яқин даромад қилади. Бу эса 2009 йилнинг рекорд кўрсаткичи бўлиши тахмин қилинмоқда.
O2 Arenaга кириш чиптасининг нархи 50дан 75 фунт стерлинггача, eBay онлайн-аукционида эса битта чиптанинг нархи 10 минг фунтга етган. Дарвоқе, маълумотларга қараганда, расмий чипта сотувчилар ҳам чайқовчилик қила бошлашган. The Times газетасининг ёзишича, AEG Live ва Viagogo компаниялари махфий келишув тузишган ва чипталарни ўз нархидан ўн баробар қимматга сотишган. Аммо хонанданинг мухлислари шу нархга ҳам розилар. Хонанданинг вакили Рэнди Филлипснинг айтишича, Жексон Лондонда 100та концерт ҳам бериши мумкин, аммо унинг бошқа режалари ҳам бор.
Майкл яна қандай режалар тузгани ҳозирча маълум қилинмаяпти. "This Is It!" концерти якунлангач, унинг асосида 3D кўринишда фильм ишланади. Агар Жексоннинг Лондондаги ташрифи муваффақиятли якунланса, у худди шундай концертни Лас-Вегасда ҳам ўтказиши мумкин.
Фақат унга соғлиги панд бермаса бўлди. Ахир дунёнинг кўплаб газеталари Жексоннинг саломатлиги яхши эмаслиги ҳақида ёзишади.
Дилшодбек тайёрлади.

7x7