Ўзбекистоннинг энг қиммат футболчисига айланган Сервер Жепаров қачон янги жамоаси таркибида шуғулланишни бошлаши мухлисларни қизиқтириши табиий. Ҳамюртимиз the-afc.com сайтига берган интервьюсида таъкидлашича, шу ойнинг охирида Мишель Прюдом шогирдига айланар экан. "Янги жамоам мавсумга тайёргарликни шу кунларда Германияда бошлайди. Мен таркибга ой охирида қўшиламан. Унгача миллий терма жамоам жаҳон чемпионати саралаш учрашуви доирасида Қирғизистонга қарши икки беллашувни ўтказади” – деб вазиятга ойдинлик киритди Жепаров. Эслатиб ўтамиз, Сервернинг К-лигадаги сўнгги ўйини 15-турга тўғри келди. Айтиш мумкинки, хайрлашув ўйини кўнгилдагидек чиққани йўқ. Сабаби, "Сеул” ушбу турда "Чонбук” билан дуранг ўйнади – 2:2.
