|
Yangi tadqiqotlar: Mobil telefon sog'liq uchun zararli
Mobil telefondan 10 yildan ortiq foydalanish saraton kasalliklarini keltirib chiqarishi mumkin ekan. Dunyoning 13 mamlakatida 10 yildan ortiq vaqt mobaynida o'z mijozlarini o'rganib borgan tadqiqotchilar shunday fikrga kelishdi.
Butunjahon sog'liqni saqlash tashkiloti hisobotida mobil telefondan o'n yil davomida va undan ortiq foydalanganlarda saraton kasalligi paydo bo'lish xavfi ortishi aytib o'tilgan. Aniqroq qilib aytganda, miyadagi eshitish asab tolasi va miyaning boshqa qismida o'simtalar yuzaga kelishi xavfi osharkan.
The Daily Telegraphning ma'lum qilishicha, izlanishlar o'n yil davom etgan va buning uchun umumiy hisobda 40 mln. dollardan ortiq mablag' sarflangan. 13 mamlakatdagi 12,8 ming kishining hayot tarzi, mobil telefondan foydalanish vaqti va salomatligi o'rganilgan. Aniqlanishicha, tekshiruvdan o'tganlar — o'n yildan ortiq mobil telefondan doimiy foydalanadiganlarning aksariyat qismida miya saratoni paydo bo'lish xavfi 39 foizga oshgan.
Tadqiqotlar rahbari Elizabet Kardis so'zlariga ko'ra, bu dastlabki natijalar hisoblanadi. Yakuniy xulosalar shu yilning oxiriga qadar e'lon qilinadi.
Kardis, ayniqsa, bolalar o'rtasida mobil telefonning keng tarqalishidan xavotirda ekanligini bildirgan.
| 
