Шаҳарларга тенглашаётган қишлоқлар - 2 Ноября 2009 - SMS SHERLAR, SMS TABRIKLAR, SMS SEVGI WWW.SHERLAR.UZ

Қишлоқ инфратузилма тармоқлари йил сайин такомиллашиб, янги қиёфа касб этиб бормоқда. Буни чекка ҳудудларда замонавий уй-жойлар қурилиб, аҳолининг табиий газ, тоза ичимлик суви, электр энергияси билан тўлиқ таъминланаётгани, йўллар асфальтланиб, транспорт ва коммуникация хизматлари тараққий этиб бораётгани мисолида яққол кўриш мумкин.
- Вилоятимизда Президентимизнинг шу йил 3 августдаги “Қишлоқ жойларида уй-жой қурилиши кўламини кенгайтиришга оид қўшимча чора-тадбирлар тўғрисида”ги қарори бўича 3 та намунавий қишлоқ аҳоли пункти барпо этиш учун 18,3 гектар ер майдони танлаб олинган бўлиб, Кармана, Қизилтепа ва Нурота туманларида йил охиригача 60 та тураржой биноси барпо этилади, - дейди биз билан суҳбатда “Қишлоқ қурилиш инвест” инжениринг компанияси Навоий вилоят бўлими директори Исломбек Cаидов. – Ҳозирги кунда намунавий лойиҳалар бўйича қурилаётган уй-жойларга 3 та пудрат ташкилоти жалб этилган бўлиб, лойиҳанинг 25 фоиз олдиндан тўлов маблағлари тўлиқ йиғиб олинди.
Қизилтепа туманида қуриладиган Маликобод қишлоқ аҳоли пунктининг лойиҳавий макети иштирокчиларда катта қизиқиш уйғотган эди. Туман марказидан уч километр узоқликдаги бу жой “Тошкент - Ашхобод” М37 республика аҳамиятидаги йўл бўйидаги ҳудуддан ажратилди. У ўзида озиқ-овқат ва ноозиқ-овқат дўконлари, маиший хизмат кўрсатиш шахобчалари, болалар ўйингоҳи ва тикувчилик цехини жамлаган маҳалла гузари, 20 та бир қаватли уйдан иборат. Уйларнинг ёпиқ ҳолда лойиҳалаштирилгани мутахассислар томонидан юксак баҳога сазавор бўлди. Эндиликда лой-пахса уйлар ўрнида пишиқ ғиштдан қилинган мукаммал меъморчилик талаблари асосида тураржойлар барпо этилади.
- Бизнинг минтақанинг жўғрофий, геологик ва иқлим хусусиятларидан келиб чиқиб, шу тоифадаги намунавий лойиҳалар яратилмоқда, - дейди И.Саидов. – Чунки вилоятимизда чанг-тўзонли шамол тез-тез эсиб туради. Шунинг учун содда ечимли ёпиқ уй лойиҳаларининг афзаллиги шундаки, қурилиш материаллари нисбатан кам ишлатилади.
Янги уй-жойлар қурилишида унинг экологиясига алоҳида эътибор қаратилаётгани аҳамиятга моликдир. Ҳовлининг баҳаво ва кўркам бўлишида дарахтлар ўзига хос ўрин тутади. Шу боис манзарали, мевали ва атроф-муҳит ҳавосини тозалаб берадиган ноёб дарахт кўчатлари ҳам эътиборда тутилган.