|
Буюк Британиянинг Daily Telegraph газетаси турли
минтақалардаги одамлар ўртасида сўровнома ўтказиб, сайёрамиздаги энг
хунук ва ноқулай автомобиллар рейтингини тузиб чиқди. Қуйида ана шу
рейтингнинг биринчи ўнталигидан жой олган автомобиллар ҳақида маълумот
берамиз.
10-ўрин. Austin Allegro.
Бу
автомобил 1973 йилдан 1983 йилгача Буюк Британиянинг ўзида ишлаб
чиқарилган. Бу машинанинг ўзига хослиги ост қисми кесиб ташланган рули
бўлган. Ишлаб чиқарувчилар буни ҳайдовчининг тиззалари қулайроқ туриши
учун деб изоҳлашган. Бироқ машина ишончли бўлмагани, орқа ойналари тез
синиб кетавергани учун муваффақиятга эриша олмаган.
9-ўрин. Suzuki X90.
Британияликларнинг фикрича, бу энг тасқара машинадир. Ҳар қандай йўлда
юролмайди, ўрин кам, нарсаларни қўйгани жой йўқ. Қўзғалиш тезлиги ёмон,
орқадаги спойллер эса аҳмоқона. Бироқ Европанинг бошқа давлатларидаги
ёшларга бу машина ёққан.
8-ўрин. Morris Marina.
Бу
машина ҳам 1970 йилларда Буюк Британияда ишлаб чиқарилган. Арзон
материаллардан ишлангани, ташқи кўриниши одамнинг ғашини келтириши ва
ишончсизлиги билан у бир неча йиллардан бери "сайёранинг энг хунук
автомобиллари” рейтингига "мустаҳкам ўрнашиб олган”.
7-ўрин. Lada Riva.
Бу машина ВАЗ-2107нинг экспорт вариантидир. Гарчи Россияда бу машина
алоҳида эъзозланса-да, Европанинг бошқа минтақаларида арзонлиги ва
ноқулайлиги учун машҳур бўлолмаган.
6-ўрин. Nissan Serena.
Японларнинг бу машинасини жойидан қўзғалишига кўп вақт сарфлагани учун
европаликлар ёқтирмас экан. 1991 йилдан 1999 йилгача ишлаб чиқарилган
бу машина жойидан қўзғалганда спидометр 0-100 км/соатни кўрсатгунгача
18 сония вақт сарфлайди.
5-ўрин. Reliant Robin.
Уч
ғилдиракли "бадбашара” ҳам 1973 йилдан 1981 йилгача Буюк Британияда
ишлаб чиқарилган. Уни одамлар мотоцикл билан бир хил мақомда солиқ
тўлаш мумкин бўлгани ва исталган жойда буриш осон кечиши учун сотиб
олишган. Бу автомобил ҳозирда электр мотор билан ҳам ишлаб чиқариляпти.
4-ўрин. Trabant.
Бу автомобил авваллари Германия демократик республикасида ишлаб
чиқарилган. Берлин девори қулагач, Ғарбий Европада ҳам оммалашган. У
энг арзон материаллардан ясалгани учун ҳам ишончсиз саналган. Бир
пайтлар икки цилиндрли двигателга эга бу машинани "Запорожец” билан
тенглаштиришарди. "Трабант – тўрт ўринли ва умумий шлемли мотоцикл”
дейишади ҳазил билан европаликлар.
3-ўрин. Yugo Sana.
Бу европалик
талабалар стипендиясининг бир қисмига сотиб олиши мумкин бўлган
автомобиллардан саналади. У Сербияда ишлаб чиқарилади. Хунуклиги учун
автобозорда ўз ўрнига эга эмас.
2-ўрин. FSO Polonez.
1978
йилдан 2002 йилгача Польшада ишлаб чиқарилган бу машина польякларнинг
машҳур рақси номи билан аталади. Ташқи кўриниши Fiat 125p автомобилидан
қўпол тарзда кўчирилган.
1-ўрин. Skoda Estelle.
1977
йилдан 1990 йилгача ишлаб чиқарилган чех автомобили Британиянинг ўзида
120 минг дона сотилган. Бутун дунё бўйлаб эса 2 миллиондан ортиқ. Гарчи
уни оилавий автомобил деб ҳисоблашса-да, дизайни хунуклиги ва двигатели
кучсизлиги учун рейтингнинг биринчи ўринидан жой олган.
| 
