|
E’tiqod erkinligi va diniy bag‘rikenglikni ta’minlash Prezidentimiz Islom Karimov yuritayotgan siyosatning muhim yo‘nalishlaridandir.
Istiqlol yillari mamlakatimizda milliy urf-odat va an’analarimiz qatori diniy qadriyatlarimiz ham qayta tiklandi. Yurtimiz musulmonlari islom dinining barcha arkonlari, jumladan, haj amallarini emin-erkin bajarish imkoniga ega bo‘ldilar.
O‘zbekiston Musulmonlari idorasidan ma’lum qilishlaricha, mustaqillik yillarida o‘n minglab yurtdoshlarimiz haj ziyoratini ado etgan. Joriy yil ham besh ming nafardan ko‘proq hamyurtimizning muborak safarga yo‘l olishi rejalashtirilmoqda. Buning uchun davlatimiz tomonidan barcha zarur shart-sharoit yaratib berilayotir.
– O‘tgan yillardagidan farqli ravishda, bu yil ziyoratchilar Buxoro, Urganch, Termiz, Namangan shaharlari aeroportlaridan ham Saudiya Arabistoniga jo‘nab ketish imkoniyatiga ega bo‘lishadi, – deydi O‘zbekiston Musulmonlari idorasi xalqaro aloqalar bo‘limi mudiri Saidbahrom G‘ulomov. – Bu ushbu hududlardan haj safariga jo‘nash uchun hozirlik ko‘rayotgan yurtdoshlarimizga qulaylik yaratib, ularning og‘irini yengil, uzog‘ini yaqin qilishi, shubhasiz.
Ayni paytda ziyoratchilar ishtirokida joylarda o‘tkazilayotgan uchrashuvlarda hamyurtlarimizga haj amallarini ado etishi uchun tegishli tavsiyalar va belgilangan boshqa tartib-qoidalar haqida tushuntirish ishlari olib borilmoqda.
Ziyoratchilarning dastlabki guruhi 10 noyabr kuni Toshkentdan Saudiya Arabistoniga yo‘l oladi.
| 
