КРИШТИАНУ РОНАЛДУ: ЭНГ КУЧЛИ БЎЛИШГА ИШОНИШ ВА ИНТИЛИШ КЕРАК! - 25 Декабря 2009 - SMS SHERLAR, SMS TABRIKLAR, SMS SEVGI WWW.SHERLAR.UZ

Португалия терма жамоаси етакчи футболчисининг матбуот анжуманини журналистлар интизорлик билан кутишди.

Кеча Цюрих шаҳрида ўтказилган ФИФАнинг 2009 йил якунларига бағишланган анъанавий маросимида бош қаҳрамонлардан бири бўлган Криштиану Роналду бугун Тошкентда. Кеча ФИФА томонидан ўтиб бораётган йилда киритилган энг чиройли гол муаллифи деб тан олинган юлдуз билан бугун ўзбекистонлик журналистлар суҳбатда. Бу ҳолат бугун "Жар” стадиони конференц-залида юз берди.

Яна бир бор эслатиб ўтамиз, кеча Криштиану Роналду шу йилнинг 15 апрель куни УЕФА Чемпионлар лигасининг "Порту” – "Манчестер Юнайтед” учрашувининг 6-дақиқасида тахминан 30 метрлардан берган зарбаси эвазига киритган тўпни ФИФА 2009 йилдаги энг чиройли гол деб топди. Йилнинг энг яхши футболчиси сўровида эса "Реал” ярим ҳимоячиси Лионель Мессидан кейинги иккинчи ўринни эгаллади.

Бугун эса у Тошкентда қаламкашлар саволларига жавоб берди:

- Ўзбекистонга ташрифингиздан кўзланган асосий мақсад нима?
- Бу ерда "Ўзбекистон маданияти ва санъати форуми” жамғармасининг "Ёш футболчиларни қўллаб-қувватлаш дастури” мавжуд бўлиб, мен ушбу лойиҳанинг ҳаётга татбиқ этилишига ўз ҳиссамни қўшмоқчиман. Ўзбек футболи ҳақида баъзи бир маълумотларга эгаман. Бу ахборотларни менга собиқ устозим Луиз Фелипе Сколари сўзлаб берди.

- Сиз кеча Швейцарияда эдингиз, бугун – Тошкентда. Бундай зич иш графиги сиз учун одатий ҳолми?
- Мен бугун сизлар билан кўришиб турганимдан ғоят хурсандман. Ҳа, менинг ташрифим узоқ вақтга мўлжалланмаган. Бироқ шу қисқа фурсат ичида ҳам ўз профессионаллик бурчимни адо этишга бор кучимни сарфлайман. Ўйлайманки, Тошкентга мен ҳали яна келаман. Энди узоқроқ муддатга келишга ҳаракат қиламан.

- Фаолиятингиз давомида сизни Туркия клубларига таклиф этишганми? (Туркиянинг "Жаҳон” ахборот агентлиги журналистининг саволи)
- Йўқ.Шу боис мен бу мавзуда сизга ҳеч нарса дея олмайман.

- Ўзбекистонда сўнгги йилларда кетма-кет мастер-класслар ўтказилмоқда. Навбатдаги мастер-классларга айнан қайси юлдузларни таклиф этиш борасида сизнинг тавсияларингиз қандай?
- Мен ҳеч кимни алоҳида тавсия қилмайман. Барча юлдузлар менинг дўстларим. Лекин сизга шуни аниқ айтишим мумкинки, мен бугун ишқибозларга ва ёш футболчиларга ўзимнинг энг чиройли кўргазмали чиқишларимни намойиш этаман. Ёшларга намунавий машқлар кўрсатишимдан мақсад эса, мен ҳар бир футболчи болалигидан энг кучли ўйинчи бўлишга ишонишини ва шунга интилишини хоҳлайман. Ҳар бир болакай бу гапни ўзига доимий шиор қилиб олиши лозим.

- Сиз ҳамиша жаҳон аҳлининг диққат марказидасиз. Шу сабабдан савол туғилади. Сиз ўзингизни профессионал футболчи деб ҳисоблайсизми ёки кўпроқ имидж томонидан машҳурроқман деб ўйлайсизми?
- Албатта, мен, биринчи навбатда, профессионал футболчиман. Шунинг учун мен фақат ва фақат футбол орқали танилишни истайман.

- Сиз тўғрингизда бир маълумот тарқалганди: эмишки, Криштиану Роналдуга Россиядан, жумладан, Москванинг "Динамо” клубидан таклиф тушган...
- Бундан умуман хабарим йўқ. Аммо сизга бир нарсани айтиб ўтай, футболда ҳеч қачон олдиндан ҳеч нарса дейиш керак эмас. Келгусида сени нималар кутиб турганини ҳеч қачон аниқ билмайсан.

- Келажакда ёш футболчиларни ўстиришга мўлжалланган шахсий марказларингиз пайдо бўлишига қандай қарайсиз?
- Мен доимо шунинг тарафдориман. Вақтим бўлди дегунча, ёш футболчилар учун тадбирларда иштирок этаман. Мана, Испания чемпионатида бироз танаффус юзага келгач, Тошкентга келдим ва бу ердаги маҳаллий иқтидорлар билан учрашмоқдаман.