Амалдаги вице-чемпион аллақачон мусобақани тарк этиб бўлганди, пайшанба оқшомида амалдаги чемпион ҳам, гуруҳ босқичидаёқ, ваколатини топширишга мажбур бўлди. Тамом - Италия энди жаҳон чемпиони эмас.

Италия терма жамоаси гуруҳ босқичида биронта ғалаба қозонмасдан плей-оффга чиқиши мумкин эди, учта дуранг билан нимчорак финалда Голландияга қарши майдонга тушиши мумкин эди. Йўқ, ундай бўлмади. Голландияга қарши энди Словакия ўйнайди.

Ўйиндан олдин барча Италия терма жамоасидан қандайдир ҳужумкор ўйин, плей-оффга олиб чиқадиган ўйин кутганди. Ундай бўлмади. Ўз тарихида илк бора жаҳон чемпионатида иштирок этаётган Словакия терма жамоаси ҳужумда номдор ҳам донгдор рақибидан кўра аниқроқ ҳаракат қилди. Италия терма жамоаси кучли ҳимояси, ҳимоявий ўйиндаги тенгсизлиги билан машҳур эди. Жаҳон чемпионати саҳифаларига энди номини ёзишни бошлаган Словакия эса ҳимояси кучли жамоанинг ҳимоясидан ёриқ топа олди. Ёки, ўша ёриқни топишда итальянларнинг ўзлари ёрдам беришди. Аввалги икки ўйинда терма жамоасининг мағлубиятдан қутулиб қолиши учун катта ҳисса қўшган Де Росси Италия жарима майдончаси яқинида Монтоливога тўпни узатишда сусткашликка йўл қўйди. Тўпни қабул қилиб олган словакиялик тўпни Виттекка оширди. Роберт тўпга бир тегиши билан Маркеттининг узоқ бурчагини аниқ нишонга олди. Биринчи бўлим шу билан тугади.

Иккинчи бўлимда кўпчилик Италиядан бошқача ўйин кутган бўлса-да, "Скуадра Адзурра” у ўйинини яна иккита тўп ўтказиб юборганидан кейингина намойиш этди. Аввалига 73-дақиқада Роберт Виттек яна бир бор ўз номини таблога ёздириб қўйишга эришди. Виттекнинг голидан 8 дақиқа ўтиб, Ди Натале Италия терма жамоасининг мусобақадаги учинчи голини уришга муваффақ бўлди. Умид учқунлари пайдо бўлганди. Параллел равишда ўтаётган ўйинда ҳисоб очилмаётгани дуранг натижа ҳам Италияни кейинги босқичга олиб чиқарди. Йўқ, кутилмаган жойдан Копунек пайдо бўлди ва у Словакиянинг учинчи голини урди. Ўйиннинг 89-дақиқаси ўтиб бораётганди. Шарҳловчилар ҳам, ишонч билан: "Словакия кейинги босқичда!”, деб юборишди.

Шошилишди. Охири барибир ҳақ бўлиб чиқишди. Лекин шошилишди. Италия сўнгги сонияларгача мухлисларни асабий бир ҳолатда ушлаб тура олди. Бунга Квальярелланинг 90+2 дақиқадаги ажойиб голи сабаб бўлди. Жарима майдончаси ташқарисидан йўлланган зарба билан Муха устидан ошириб туширилган гол, шубҳасиз, мусобақа якунига етганидан кейин ҳам ЖАРда киритилган энг чиройли голлардан бири дея топилса ажабмас... Италияга битта гол керак эди, аммо у гол бўлмади. Сўнгги дақиқаларда Словакия ўйинни чўзди, вақтни олиш учун ўйинчи алмаштирди, ўйинчилари ётиб олишди... Ва охир-оқибат Словакия ғалаба қозонди! Словакия плей-оффга чиқди.

Ўйиндан кейинги кўз ёшлар... Италия аламдан йиғласа, Словакия қувончдан йиғларди... Тўрт йил аввал мовий гвардияни чемпион қилган Липпи Уэббнинг финал хуштаги янграши билан майдонни тарк этди; тўрт йил аввал жаҳон чемпионатидаги ғалабаси сабаб "Олтин тўп”ни қўлга киритган Фабио Каннаваро бу сафар словакиялик футболчи билан қўл беришиб кўришиши мумкин, аммо бундан ортиғига (айниқса, футболка алмаштиришга) асаби ҳам, тоби ҳам йўқ: ўзини тўхтата олмай йиғлаётган Квальяреллани овутиши керак...

Қирол ўлди. 12 июлга ўтар кечаси, бемалол, "Яшасин қирол!”, дея бақириш мумкин...

ЖЧ-2010, гуруҳ босқичи
"F" гуруҳи, 3-тур
24 июнь, пайшанба
Словакия – Италия – 3:2 (1:0)
Голлар: 1:0 – Виттек (25), 2:0 – Виттек (74), 2:1 – Ди Натале (81), 3:1 – Копунек (89), 3:2 – Куальярелла (90+2).
Словакия: Муха, Пекарик, Шкртел, Дюрица, Забавник, Кучка, Штрба (Копунек, 87), Штох, Гамшик, Йендришек (Петраш, 90), Виттек (Шестак, 90).
Италия: Маркетти, Каннаваро, Кьеллини, Дзамбротта, Кришито (Маджо, 46), Де Росси, Монтоливо (Пирло, 56), Гаттузо (Куальярелла, 46), Ди Натале, Пепе, Яквинта.
Огоҳлантиришлар: Штрба (16), Кришито (31), Виттек (40), Пекарик (50), Кьеллини (67), Пепе (76), Муха (82), Куальярелла (83).