Buni qarangki, abort oqibatida Hindiston har kuni yetti mingga yaqin qizni yo‘qotayotgan ekan. Buyuk Britaniyaning "The Lancet” tibbiy jurnali ma’lumotlarida keltirilishicha, so‘nggi 20 yil mobaynida mamlakatda 10 millionga yaqin qiz chaqaloqlarga tug‘ilish nasib etmagan.

Xavotirga tushib qolgan hukumat qiz farzand ko‘rgan oilalarga yordam puli ajratishga tayyorligini ma’lum qildi. Aytish kerakki, bu shunchaki yordam puli emas. E’tibor bering, oilasida qiz tug‘ilgan ota-onalarga domiy tarzda 15500 rupiygacha, taxminan 384 dollardan to‘lab borilishi rejalashtirilgan. Buning ustiga, agar qiz bola 18 yoshida turmushga chiqmasa va maktabni yakunlasa, uning oilasiga 100 ming rupiy, aniqrog‘i, 2500 ming dollar to‘lanadi. Qolaversa, qiz voyaga yetgunga qadar, davlat oilaning sug‘urta xarajatlarini qoplab boradi. Bu o‘rtacha 200 ming rupiy deganidir.

Ushbu dasturga bir yil davomida 100 million rupiy (2,5 million dollar) sarflanishi va dotatsiya to‘lanadigan oilalar soni 100 mingdan oshishi ko‘zda tutilgan.

Hukumatning bunday katta mablag‘ni aynan ushbu maqsadda sarf qilishiga sabab nima? Nega hindlar o‘z qizlaridan voz kechayapti? Axir Hindistonda Xitoydagidek "Bir oilaga — bir farzand” deyilmaydi. Odamlar bittagina bola ko‘raman o‘zi, degan xayoldan yiroq. Gap shundaki, sharq mamlakatlaridagidek, Hindistonda ham o‘g‘il bola oilaning bo‘lg‘usi boquvchisi hi­sob­lansa-da, boshqalardan farqli jihati — katta miqdordagi qalin puli Hindistonda kuyov tomondan emas, aksincha, qiz tomondan talab qilinadi.

Hindiston hukumati tashvishiga sabab ham aynan shu. Oila byudjetini nochor holga keltiradigan darajadagi to‘y sovg‘asi mamlakatda jinsiy disbalans (ayollar va erkaklar sonidagi tafovut)ni yuzaga keltirishi mumkin yoki allaqachon yuzaga keltirib bo‘lgan.

Statistikaga murojaat etiladigan bo‘lsa, Hin­dis­tonda har ming erkakka 927 nafar ayol to‘g‘ri keladi. Vaholanki, dunyoda erkaklarga nisbatan ayollar ko‘proq. Ularning nisbati 1000 ga 1050 atrofida. Agar kuniga yetti ming nafar qizdan voz kechilaversa, vaqti kelib, qalin pulini talab qilishga kelin ham qolmaydi-ku. Nahot, hind kuyovlarining insofga kelishi uchun shunday fojea yuz berishi shart bo‘lsa.