|
Бир марталик идишларнинг афзал томони нимада? Ҳар хил юқумли
касалликлар тез тарқалмайди, дейсизми? Бировларнинг идишидан бошқалар
тановул қилмайди, дейсизми? Хуллас, санитария ва гигиеник нуқтаи
назаридан овқатланиб бўлгач, ахлатга ташланиб юбориладиган ва такрор
ишлатилмайдиган идишлар айни муддао, демоқчисиз. Гапингизда жон бор.
Американинг Калифорния штатида яшайдиган йигитча Чиминг Боэй (Cheeming
Boey) бундай кундалик эҳтиёждаги буюмдан янги талқинда фойдаланиш
йўлини топди.
      
Аксари
бир марталик идишлар рангсиз, аниқроғи, оқ рангда. Фантазияси кучли
рассом учун бу жуда қўл келди. Чиминг Боэй уларга турлича тасвирларни
тушириш санъатини ривожлантириб юборди. Унинг қўли теккан бир марталик
стаканчалар антиқа ва ноёб санъат асарларига айланди, десак муболаға
бўлмас. Айтишларича, ресторанга кириб, таом келтиришларини
кутиб ўтирган Пабло Пикассога кутилмаганда илҳом келиб қолади ва у
қўлига тушган салфеткага расм чизишга уннаб кетади. Мана энди
калифорниялик рассом овқатланиш жойларининг бошқа буюми бўлмиш – бир
марталик идишларга ўзининг фантазияларини туширишни одатга айлантирди.
Бундай идишларни ишлатиб бўлиб, ахлатга ташлашга кўзингиз ҳам қиймайди.
|
