Коннентикут штатидаги Дэнбери шаҳрида яшовчи
бир киши лотерея сотиб олган куни вафот этади. Худди шу лотереяга эса
10 миллион доллар ютуқ чиқади. 79 ёшли
Дональд Питерс лотерея чиптасини ўтган йилнинг 1 ноябрь куни сотиб
олган. Лотерея сотиб олиш оилавий анъанага айланган эди. Шу куни
томорқасида ишлаётган Дональднинг кутилмаганда юрак хуружи тутиб қолади
ва вафот этади. Лотерея натижалари декабрь
ойининг бошларида эълон қилинади. Лекин Дональднинг хотини эрининг
лотереясига катта миқдордаги ютуқ чиққанлигини бир ойдан кейингина
билади. Чунки у вафот этган эрининг маъракалари билан банд бўлган.
Дональднинг хотини эрининг кийимларини тартибга солаётганда лотерея
билетини кўриб қолади. Аввалига уни ташлаб юбормоқчи ҳам бўлади. Лекин
қизиқиши устун келиб, уни текшириб кўргиси келади. Қарасаки... «Гапиролмай
ҳам қолдим», — дейди Питерс хоним. Ундан бу ютуқ пулларини
нимага сарфлаши ҳақида сўрашганда Питерс хоним шундай жавоб берган.
«Мен ҳар доим «Корветт» русумли машина олишни орзу
қилардим. Лекин энди ўйлаб кўраман, балки кичикроқ машина сотиб оларман
ёки яна ютуқли бирор хил ўйин ўйнарман». Бу
оилада уч ўғил бор. Улардан бири «Агар дадам бу пулни ютганини
билганида эди, у киши ўлганидан афсусланарди», дея ҳазил гап ҳам
қилган. БАНКНИНГ ХАТОСИ — 100 МИЛЛИАРД ФУНТ СТЕРЛИНГ Британиянинг
Эршир шаҳрида яшовчи 38-ёшли Дональд Моффэт (Donald Moffat) Янги йил
арафасида банкдан ўзининг 100 миллиард фунт стерлинг қарздорлиги ҳақида
хабарнома олиб, ҳайратга тушди. Аниқланишича, бу техник хато бўлиб
чиқди. Банк Моффэтнинг рақамидан икки
марта 50 миллиард фунт стерлингдан ўчирган ва бу пулни унинг ўзидан
талаб қилишган. Моффэт бу хабардан кейин хафа бўлиб банкка қўнғироқ
қилган ва вазиятни ойдинлаштирган. Бекорга ташвишга қўйишгани учун банк
унга 10 фунт стерлинг товон пули тўлаган. Моффэт эса бунга рози
бўлмаган ва катта миқдордаги пул беришларини талаб этмоқда. Barclays банки бу техник хато эканлигини айтиб, бу хатодан ҳеч ким зарар кўрмаслигини таъкидлашмоқда. САЙЁРАМИЗНИНГ ЭНГ КЕКСА АЁЛИ ВАФОТ ЭТДИ Португалияда
шу ҳафта 115 ёшга кирган сайёрамиздаги энг кекса аёл вафот этди. Унинг
исми Мария де Жезуш (Maria de Jesus). Марҳуманинг қизининг айтишича,
аёл касаллиги сабаб шифохонага олиб кетилаётганда «Тез
ёрдам» машинасида бандаликни бажо келтирган. Мария
де Жезуш 1893 йилнинг 10 сентябрида туғилган. У 12 ёшидан бошлаб қишлоқ
хўжалигида ишлаган. Қизиғи шундаки, у бир кун ҳам мактабга бормаган ва
умрининг охиригача на ёзишни, на ўқишни билмаган. У бирор марта ҳам
касал бўлмаган, дори нималигини билмаган. Мария
де Жезуш вафотидан кейин сайёрамизнинг энг кекса аёли америкалик
Гертруда Бейнс (Gertrude Baines) бўлиб қолди. У 1894 йилнинг 6 апрелида
туғилган. 60 МЕТРДАН ЙИҚИЛДИ ВА... ТИРИК ҚОЛДИ Австралиялик
бейс-жампер (баландликдан сакровчи спортчи) баландлиги 60 метр бўлган
кўприкдан парашюти очилмай қолганлиги учун йиқилиб тушган ва енгил
жароҳат олган, холос. Парашют нима
учун очилмай қолганлиги аниқланмоқда. Спортчининг оёғи сал-пал жароҳат
олган. Шифокорларнинг айтишича, бу кутилмаган бахт. Бундай баландликдан
йиқилганлар камдан-кам ҳолатларда тирик қолишади. ИНСОН СОЧИ ҲАМ ЎҒИТ ЭКАН Миссисипи штати университети олимлари инсон сочи кучли ўғит эканлигини исботладилар. Одатда чириган япроқлар, мол нуриси ўғит ўрнида ишлатилади. Энди уларнинг сафига инсон сочини ҳам қўшиш мумкин. Оддий
қишлоқ хўжалигида бу амалда қўлланиб кўрилди. Инсон сочи ўсимликлар
ўсадиган тупроққа аралаштирилди. Бу усул синаб кўрилганда
ўсимликларнинг ўсиши тезлашгани ва ҳосилдорлик юқори бўлганлиги
аниқланди. ҚОБОҚДАГИ РЕКЛАМА Буюкбританияда қизиқарли реклама кампанияси бўлиб ўтмоқда. Косметика
ашёлари сотиладиган дўкон хўжайини реклама учун энг ғаройиб усулни
ўйлаб топди. Улар атир, турли хил кремларнинг номларини инсонларнинг
қобоқларига ёза бошладилар. Бу одамларнинг ҳар бир кўз очиб-юмиши учун
10 пенс тўланади. Чунки кўз юмилганда қобоқдаги ёзувларни ўқиш мумкин.
Бу эса ўзига хос тарздаги тарғиботдир. Тўғри,
бу йўл билан пул топишни истаётганлар сони чекланган. Кўзларни қанча
юмиб-очишса-да, реклама учун 100 фунтдан кўп тўланмайди.
| 
