Odamlarni kuzatishni, hayotga chetdan razm solishni,
ko’ngilni tahlil qilishni yaxshi ko’raman… Shularga asoslanib hikoyalar
turkumidan iborat "Muhabbat manzaralari” nomli mittigina qissani
yozdim. Muhabbat bu ikki dil o’rtasidagi murakkab munosabatgina emas.
Muhabbat… iymon, sadoqat, o’kinch, quvonch, xiyonat… Hayot ranglarining
har bir taqdir suratida aks etishi… Ishonmasangiz, "Muhabbat
manzaralari”ni o’qing...
Nasibaga.
Ayriliq azobidan azoblanayotagn ko’ngilning mungvash nolalari sarobdan
so’zlaydi. Baxt istab, armonni asrab olgan dil so’ngsiz iztirobda.
Uning tillarida qachonlardir shu quvonchli so’zlar bor edi:
"men tanlagan inson hech kimga o’xshamaydi.” Ha, u hech kimga o’xshamas
achchiq qismatni aynan o’sha "najotkori” ortidan topdi.
Muhabbat-baxt… muhabbat va nafrat. U oniy lahzalargagina baxtiyor
bo’ldi. U umrbod nafratlanadigan bo’ldi. Uning pokiza qalbini, shirin
orzularini, taqdirini o’sha "hech kimga o’xshamas” insoni hech kimga
o’xshamay o’ynadi. Nega.? Ishonch degan matoh shunchalar arzonmidi,
muhabbat bozorida.?
Ha, muhabbat bozorga aylanib ulgurgan ekan. Bilmas ekan u… bu bozorda
avval uning chirog’I, keyin aqli taroziga solindi. Hammasi joyida edi.
Faqat so’nggisi- "oddiy oilaning farzandi” ekanligiga kelganda tarozi
o’ynoqladi. Ko’ngil ikkilanib qoldi. Bu bozor bo’lmay nima?!
Muhabbatning qadri shu qadar toptalib borayotganini bilmasdi, bechora
yurak. Ishonch aldadi…
Hammasi yolg’on ekan-da… Aldamchi nigohlar… Yolg’on va’dalar… Alam
qilarkan… "Nega?” deya qo’llariga titrab tig’ni oldi… "Hamma qilmishi
uchun javob berishi kerak.!” Lek joyidan jilolmadi. Yuragi alamlar
uchun, taqdiri faqat "armon” uchun yaralgan bo’lsada, qo’llari qotillik
uchun yaralmagan ekan. U kabi baxt o’g’risi emas ekan u…
Ko’ngil tilga kirdi: "Xudo bor-u.”
Yillar insonlar yodidan, uning peshanasidagi achchiq tamg’ani chiqardi.
Sirdosh yostiqlar sevinch yoshlariga guvoh bo’lishdi. Xazonlar uchib
yurgan bog’larga bahor qaytdi. Kemtik dilning baxti butun bo’ldi.
Orzular siymosidagi insonlar bir-bir almashishdi, xolos.
Dil "muhabbat” qo’rg’onidagi sadoqat va bardosh ila baxtini… topdi.
Yulduzlarga termulib: "U hech kimga o’xshamaydi,” deya ayta oldi qayta
quvonib… U arzirdi bu baxtga … Ko’z tegmasin, ilohim.
