Яқинда Каннда бўлиб ўтган кинофестивалда Мани Ратнам билан ҳамкорликда ишланган "Ravaan" фильми меҳмонлар эътиборига ҳавола қилинди, яна бир лойиҳа ҳам ўз якунига етиш арафасида.
Режиссёр С. Шанкар томонидан суратга олинаётган илмий-фантастик жанридаги «Робот» («Endhiran») картинасида бош эркак қаҳрамон ролини Жанубий Ҳиндистоннинг энг машҳур актёри Ражникант, бош қаҳрамон аёл ролини эса – Айшвария ижро этмоқда. «Харобалик миллионер»да янграган саундтреклар муаллифи А.Р.Раҳмон «Робот» учун ҳам ўзининг оригинал ижод маҳсулини тақдим этишга ваъда берган. «Айшварияга фильм учун ёзилган куйлар шу даражада ёқиб қолдики, у фильмга яна битта қўшиқ киритишимни илтимос қилди, ўша тарона ёзилса, картина битди ҳисоб», деди режиссёр. Айтганча, «Робот» фильми нафақат Жанубий Ҳиндистон, балки бутун Ҳиндистон бўйича энг қиммат фильм бўлиши кутилмоқда. Продюсерлар томонидан фильм учун 165 крор (тахминан 33 миллион доллар) маблағ тикилган. Фильм режиссёри ўзининг бу лойиҳасини 2001 йилда амалга оширишни ният қилган бўлса-да, суратга олиш ишларига 2008 йилдагина старт берилди. Маълумотларга қараганда, фильмда ҳинд киноси тарихида ҳали бирор маротаба ҳам акс этмаган манзаралар томошабин эътиборига ҳавола қилинади. Шуни айтиш жоизки, актёрлар таркиби ҳам мунтазам ўзгариб турган. С. Шанкар аввалига фильмда Камол Хасан ва Прити Зинтани суратга олмоқчи бўлган, кейин улар Викрам ва Шоҳрух Хонга ўзгартирилди. Охир-оқибат фақатгина Айшвария Рай ва Ражникантнинг иш режалари режиссёрнинг иш графиги билан жуда мос тушди.

7x7