|
Dunyoning eng qoloq o‘quvchisi 39-marta ham imtihondan o‘tolmadi. Radjastxan shtatida istiqomat qiluvchi hindistonlik nafaqaxo‘r navbatdagi maktab bitiruv sinovlarini ham muvaffaqiyatsiz topshirdi. “The Daily Telegraph” gazetasida yozilishicha, bu yil 74 yoshli Shiv Charan belgilangan 10 ta imtihondan faqat bittasinigina topshirgan. Ingliz tili, matematika, sanskrit va boshqa fanlardan “qovun tushirgan” otaxon faqat Hindiston rasmiy tili — hindi bo‘yicha kerakli bilimlarni o‘zlashtirgani ma’lum bo‘ldi.
Otaxon 1969 yildan buyon bitiruv imtihonlariga qatnaydi. U to o‘rta ma’lumot olmaguncha uylanmaslikka qaror qilgan. Shundan buyon Charan janoblari har yili, o‘rtada ikki yillik tanaffus bilan, imtihonlarni topshirishga harakat qiladi, ammo har gal ish teskarisidan ketadi. Hozircha qariyani dunyodagi eng yomon o‘quvchi sifatida rekordlar kitobiga kiritish mumkin, deb hisoblashmoqda.
Uzluksiz omadsizlikka qaramay, Shiv Charan taslim bo‘lmoqchi emas. Darvoqe, u o‘z muvaffaqiyatsizliklarining sababini matematikada, deb biladi. Har qalay hindistonlik bobo shaxsiy hayotiga daxldor va’dasining ustidan chiqmoqda. Ammo aytishicha, u uylanadigan ayol 30 yoshdan katta bo‘lmasligi kerak.
|
